بين ليلَة ونهارْ

ياكْ كْبْرنا وتعَلّمْنا !
ياكْ بْكينا وندْمنا !
ياكْ تغَيّرْنا وتطّوّرْنا !
ياكْ بْنينا آمالْنا وحلمْنا !

***

بْنادم يغْلي والنّارْ شاعْلَة في اجْسادو
تْبدّلتْ لعْقولْ،
بينْ ليلَة وانْهارْ هَبّت الرّيح ،
واتحَطّمتْ الاشْجارْ.

***

اهتزّتْ لجْبالْ وتهَدّتْ الرّجالْ،
واكْثَرْ القيلْ والقالْ،
والميزانْ لّي كانْ متْقادْ،
مالْ وتخَرّبَتْ لبْلادْ.
***

آه ! مصايْبنا كثْراتْ،
احْنا لّي عايْشينْ فيها ...
وعقولْنا تشتّاتْ،
وبقينا غارْقينْ فيها ...

***

بينْ قلْبي وقَلْبك وقَلبْ القمَرْ زمانْنا وسّخوهْ الاشْرارْ،
لوكانْ تاريخْنا يْعَمّرْ لقلوبْ بالمحَبّة ؟
ماشي بالبُغْضْ والكذوبْ والبُهْتانْ،
ما نكونوا عبيدْ ف يَدْ التُّجّارْ !

***

آه ! ياويلْ من طاحْ في بئرْ،
واصْعابْ عليهْ طلوعوا !
راها الدّنْيا عامرة بالهمومْ،
فيها الفايقْ وفيها المخْدومْ،
لازمْ يا بنادمْ تعرفْ كيفْ تعومْ !
راهْ طريقْ الخيرْ ترَجّعكْ وتعَقّلكْ،
وطريقْ الشّرّ تعَوّجكْ وتندّمكْ.

***
بقلم عواطف عبد السلام
بروكسيل في 16-04-2014